Աֆղանստանում վրացի 28 զինվորականի մոտ կորոնավիրուս է հայտնաբերվել

Վրացի 28 զինվորականի մոտ կորոնավիրուս է հաստատվել, ովքեր մասնակցում են Աֆղանստանում «Վճռական աջակցություն» խաղաղապահ առաքելությանը։ Այս մասին հաղորդում է «News-Georgia» լրատվական գործակալությունը՝ հղում անելով պաշտպանության նախարարության մամուլի ծառայությունը:

Աղբյուրի փոխանցմամբ՝ COVID-19 ունեցող խաղաղապահները վերադարձել են Վրաստան ռոտացիայի սկսվելուց մի քանի շաբաթ առաջ: Զինծառայողները հայրենիք են վերադարձել Գերմանիայի օդուժի ինքնաթիռով՝ բժիշկների և այլ բուժանձնակազմի ուղեկցությամբ։

Ինչպես նշվում է, բոլոր զինվորականների վիճակը բավարար է: Նրանց մոտ հիվանդությունն ընթանում է առանց բարդությունների: Պարզվել է, որ «վարակի աղբյուրը կապված է տեղի աֆղանական անձնակազմի հետ»:

Վարակվածները բուժում կստանան Գորիի զինվորական հոսպիտալում: Մյուս վրացի զինվորականներն Աֆղանստանից վերադառնալուն պես երկու շաբաթ կմնան կարանտինում:

Պաշտպանության նախարարությունում շեշտում են, որ նրանք վարակման վտանգի տակ չէին, քանի որ Աֆղանստանում 28 վարակված խաղաղապահները մեկուսացվել էին: Ընդ որում, գերատեսչությունում նշում են, որ համաճարակաբանական բոլոր միջոցառումները տեղի են ունեցել «ՆԱՏՕ-ի կողմից սահմանված կանոններին համապատասխան»: