Պեկին․ Միջազգային հանրությունը պետք է հակազդի ԱՄՆ-ի կողմից Իրանի դեմ պատժամիջոցների վերականգնմանը

Միջազգային հանրությունը պետք է հակազդի ԱՄՆ-ի կողմից Իրանի դեմ պատժամիջոցների վերականգնմանը, նշված է Չինաստանի ԱԳՆ պաշտոնական ներկայացուցիչ Հուա Չունյինի հայտարարության մեջ՝ նվիրված իրանական միջուկային խնդրի վերաբերյալ Համատեղ համապարփակ գործողությունների ծրագրի ստորագրման տարելիցին: Այս մասին տեղեկացնում է «ՌԻԱ Նովոստի» լրատվական գործակալությունը։

Հինգ տարի առաջ Իրանը և միջազգային միջնորդների «վեցյակը» իրանական ատոմի խնդրի կարգավորման համաձայնության հասան: Գործարքը, սակայն, նախնական տեսքով չգոյատևեց անգամ 3 տարի. 2018 թվականի մայիսին ԱՄՆ-ն հայտարարեց համաձայնագրից միակողմանի կարգով դուրս գալու և Թեհրանի դեմ խիստ պատժամիջոցները վերականգնելու մասին:

«Միջազգային հանրությունը պետք է միասին հանդես գա Իրանի դեմ պատժամիջոցների երկարաձգման կամ վերականգնման դեմ, պնդի, որ ԱՄՆ-ն վերադառնա ՀՀԳԾ-ն հարգելու և կատարելու ուղուն»,- հայտարարել է Հուա Չունյինը:

Նա ափսոսանք է հայտնել այն կապակցությամբ, որ ԱՄՆ-ն վերջին տարիներին վարում է միակողմանի գործողությունների քաղաքականություն, հեռանում իր միջազգային պարտավորություններից և դուրս գալիս միջազգային պայմանագրերից:

«2018 թվականի մայիսին ԱՄՆ-ն դուրս եկավ ՀՀԳԾ-ից, դրանից բացի, սկսեց ամբողջ ուժով խոչընդոտել համաձայնագրի մյուս անդամների կողմից այն կատարելուն, ինչը հանգեցրեց Իրանի միջուկային հարցի շուրջ լարվածության մեծացման»,- հավելել է Հուա Չունյինը:

Չինաստանի արտաքին քաղաքականության գերատեսչության ներկայացուցիչը նշել է, որ ամերիկյան կողմը ներկայումս ամբողջ ուժով փորձում է Անվտանգության խորհրդում առաջ մղել զենքի մատակարարման էմբարգոյի երկարաձգումը և «սպառնում է վերադարձնել Իրանի դեմ ՄԱԿ ԱԽ վերականգնվող պատժամիջոցները՝ փորձելով հետագայում ևս խափանել համաձայնագիրը»:

Նա հավելել է, որ գործարքով ստանձնած պարտավորությունների մի մասի կատարումից Իրանի հրաժարվելը ԱՄՆ-ի կողմից առավելագույն ճնշման հետևանքն է:

«Չինական կողմի կարծիքով՝ ՀՀԳԾ պաշտպանությունն ու կատարումը իրանական միջուկային խնդրի խաղաղ լուծման միակ ճիշտ ճանապարհն է»,- ամփոփել է Հուա Չունյինը: