Ուրիշ խումբ մարդիկ մտածում են, որ մենք պետք է լինենք, մեզ հետ են կապում ՀՀ-ում որոշ գործընթացների շարունակակությունը․ Լենա Նազարյան

Եթե իրենց առաջարկը հրաժարականն է, ապա մերը ընտրություններն են։ Այս մասին «Սիվիլնեթի» հետ զրույցում նշել է ԱԺ փոխնախագահ Լենա Նազարյանը։

«Որպեսզի հանգուցալուծում տեղի ունենա, այն ուժերը, որոնք մարդկանց հրապարակներ են տանում, պետք է հանգուցալուծման ցանկություն ունենան։ Իմ պատկերացմամբ՝ նրանք հանգուցալուծում չեն ուզում։ Չեն ուզում ժողովրդին հարցնել, թե ինչ է ուզում ժողովուրդը։ Նրանք պարզապես ուզում են, որ մենք գոյություն չունենանք, բայց մեր գոյությունն ինքնանպատակ չէ։ Ուրիշ խումբ մարդիկ մտածում են, որ մենք պետք է լինենք, քանի որ մեզ հետ են կապում Հայաստանում որոշ գործընթացների շարունակակությունը։ Նրանք մեզանից ակնկալիքներ ու պահանջներ ունեն։ Հիմա ի՞նչ անել։ Արտահերթ ընտրությունները հանգուցալուծման ճանապարհներից մեկն է, բայց վարչապետը երեկ հրավիրեց քննարկումների, կարող են լինել այլ ճանապարհներ։ Եթե իրենց առաջարկը հրաժարականն է, ապա մերը ընտրություններն են»,- ասել է Լենա Նազարյանը։

Նազարյանի կարծիքով՝ «Իսկանդերի» վերաբերյալ Նիկոլ Փաշինյանի հայտարարությունից հետո հայ-ռուսական հարաբերությունները չեն տուժել. «Չեմ կարծում՝ այդ հայտարարությամբ հայ-ռուսական հարաբերությունները մեծ վնաս են կրել»:

Դիտարկմանը՝ օրինակ ՀԱՊԿ-ի գլխավոր քարտուղար, գեներալ-գնդապետ Յուրի Խաչատուրովի նկատմամբ քրգործ հարուցելը չի՞ վնասել հայ-ռուսական հարաբերություններին, Նազարյանը պատասխանեց․ «Եթե որոշ անձերի նկատմամբ կան իրավական հարցեր, ինչպե՞ս վարվել այդ դեպքում, չտա՞լ այդ հարցերը»։